TUTTU BUCO ‘osso buco’

Tuttu usso buco, meeqqanik inersimasunillu mamarineqarluartartoq. Tuttup neqaanik usso buco sivisuumik qalaartitaq kartoffelmos-ilerlugu tulluartoq.

Uani Osso buco-mut igariaatsimut ilitsersuummi misilittagaqarfigilluarpara meeqqat aamma mamarilluartarmassuk, tuttup patia pilernguttarmassuk.

Illit aamma una malittarisassaq malillugu mamarluinnartunik nerisassanik sanasinnaavutit.

Uani nerisassiornermik ilitsersuummi atorneqassaaq 1500 gr. Tuttup kanaavanik sanaat Osso buco-liassat, soorunami aamma allanik sananeqarsinnaapput soorlu umimmaap, nersussuup savalluunniit kavanaavaniik. 1500 gr. Osso buco neqit saarngillu atugassat annertorpalukkaluarluni inunnut 4-5 naammattarput.

---

AKUSSAT

Osso buco

• 1500 gr. Tuttu Osso buco

• 5 gulerod

• 4 bladselleri

• 2 uanitsut

• 3 hvidløg

• Tupaarnat

• 3 dl rødvin

• 1 tomat

• 1 qillertuusaq cherry tomat

• 3 alussaatit qajuusat

• 1 liter, fond tulluarsorisaq, uani atorneqarpoq nersussuup boullion-ianik fond.

• Taratsut

• Qasilitsut

Kartoffelmos

• 1 kg naatsiiat

• 1.5 dl immuk

• 50 gr punneq

• Taratsut

AALLAQQAASIUT

Neqit sinaatsigut silataaniik ilummut savik atorlugu avissiffigineqassapput ameraasaa kipineqarluni, siatsinermik neqip ameraasaa qumartussaammat taamaasillutik neqit kusanarnerusumik sianneqarsinnaassammata.

Gulerod ameraajarnikut, bladselleri salinnikut uanitsullu agguararneqassallutik.

Naatsiiat kartoffelmos-iliassat salinneqassapput ameraajarneqarlutilu, allamullu ilineqarallarlutik, aatsaat Osso bocu naammassiartornerani qalaanneqarumaarmata.

IGANEQARNERI

Igamut siatsivusinnaasumut, siatsiviinnarmulluunniit neqit punnermut sianneqassapput kajortinnissaata tungaanut.

Neqit kajortippata puuguttamut ilineqarallassapput, igamullu siatsiviusimasumut gulerod, bladselleri uanitsullu agguararnikut sianeqqassallutik.

Gulerod, bladselleri uanitsullu sianneranni tupaarnat hvidløg-ilu presserlugu igamut siaqataatinneqassapput. Tupaarnat uani atorneqartut aasakkut asimi katersorneqarsinnaasarput, uanilu aluussaat ilivitsoq atorneqarluni.

Neqit igamut ikineqaqqissapput rødvinilu igamut kuineqassalluni, rødvin kuineqareerpat nersussuup boullion-ianik fond-i kuineqassalluni.

Tomateq agguararnikoq, qillertuusarlu cherry tomat aamma igamut kuineqassalluni.

Taratsut qasilitsullu naggasiutigalugit igamut ikineqassapput, igarlu matullugu, kissassuseq annikilleriarlugu qalaartinneqassaat aalatillataajutigalugu 2,5 tiimit.

---

Kartoffelmosi

Naatsiiat ameraajarnikut igamut imermik immernikumut ikineqassapput qalanneqarlutillu. Naatsiiat qalanneranni taratserneqassanngillat, aatsaat naammassereerpata taratserneqassammata.

Naatsiaat qalanneqassapput ajassaammik kapigaluarlugit ajassaammiit kataannartalernissaata tungaanut, naatsiiat angisissussaat apeqqutaalluni qalannissaata sivisussusaa nikerarsinnaavoq.

Naatsiaat qalareerpata imertaa kuineqassaaq.

Punneq immullu naatsiiaanut ikeriarlugit naatsiiat aserorterneqasapput, kartoffelmosillu ilusaa naammagileraanni taratserneqassallutik.

Tuttu Osso bocu taamaalilluni naammasseriarpat sassaalliutigineqassaaq kartoffelmosilerlugu saniatigullu rødvini tulluartarluni.

Takan' 🦌